Bëngnü tles plates dl FOTOCLUB VAL BADIA
cod.fisc. 92020920218

Nöia email: fotoclubvalbadia@rolmail.net

PROGRAM 2010

„Dolomites, patrimone dl Unesco“
N concurs de fotografia metü a jì dal Fotoclub Val Badia

Ai 26 de jügn dl 2009 é le Dolomites gnüdes detlarades ofizialmënter patrimone universal dl’umanité dal Unesco. La majera pert dla jënt vëiga chësc reconoscimënt sciöche na ocajiun por valorisé deplü le raiun, tres la creaziun de museums, posc d’osservaziun y istituziuns por l’inrescida scientifica. Important él dessigü ince che la jënt, chi da chilò y i foresc, impares da conësce tres deplü y damì les Dolomites, deache mâ dailò pòn les aprijé por le valur ch’ares à. Chi che strabacëia la natöra sa gonot massa püch, ai ne la conësc nia y ne n’é nia bugn de capì l’importanza che ara à. Ai n’é nia bugn da la respetè.
De chësc vers s’à le Fotoclub Val Badia ponsè de dè so contribut, por documentè les belëzes de nostes munts y ti les mostrè a chi che vëgn da foradecà, mo ince a chi da chilò che à val’ iade massa da fà da i jì do a so laûr y se stënta porchël da odëi le paraîsc ch’ai à incërìa. Insciö à le Consëi dl Fotoclub scrit fora por l’ann 2010 n concurs da fà jö cun le tema „Dolomites, patrimone dl Unesco“ davert a düc. Pro chësc tema tómel ite de vigni sort de retrac che à da nen fà cun les munts metüdes sot a sconanza.
Les plü beles fotografies menades ite por le concurs gnarà sambëgn premiades, aladô dl regolamënt dl concurs, y spo metüdes fora te na mostra de fotografies dal medémo titul „Dolomites, patrimone dl Unesco“ che gnarà organisada fora por l’altonn tla sënta dl Istitut Ladin „Micurà de Rü“ a San Martin.
Le concurs é davert a düc y al vêl le regolamënt publiché söl sit internet dl Fotoclub:
www.fotoclubvalbadia.ladinia.net Les fotografies po gnì dades jö o menades por posta al presidënt dl Fotoclub, Helmut Elzenbaumer, Str. Pares, 10, 39030 La Val, cina ai 15 de setëmber dl 2010.
Les plü beles fotografies gnarà metüdes fora te na mostra che é preodüda por l’altonn 2008. Les 10 fotografies plü beles gnarà chirides fora da na juria metüda sö dal Consëi dl Fotoclub y premiades cun la soma de 250, 150 y 100 €uro por i pröms trëi posc y de 25 €uro dal 4. al 10. post.